काठमाडौं। नेपाल प्रिमियर लिग(एनपीएल)को दोस्रो संस्करण आजदेखि शुरु हुँदैछ। नेपाली क्रिकेटकै इतिहासमा पहिलोपटक घरेलू मैदानमा हुने खेलहरु फ्लड लाइटमा हुनेछ भने दर्शकको लागि १० हजार क्षमताको प्याराफिटपनि बनाइएको छ । आइतबार बेलुकी एक कार्यक्रमका बीच सरकारले राष्ट्रिय खेलकुद परिषद्मार्फत नेपाल क्रिकेट संघ (क्यान)लाई स्टेडियम हस्तान्तरण गरेको थियो ।
साबिक विजेता जनकपुर बोल्ट्स र काठमाडौं गोर्खाजले उद्घाटन खेलमा प्रतिस्पर्धा गर्दैछन्। यो भिडन्त सोमबार दिउँसो ४ बजे त्रिवि क्रिकेट मैदान कीर्तिपुरमा सुरु हुँदै छ।एनपीएल दोस्रो संस्करणका सबै खेलहरु त्रिवि मैदानमा हुनेछन् । लिगका ९ खेल दिउँसो र २३ खेल डे नाइटमा हुने क्यानले जनाएको छ । मंसिर २७ गतेसम्म सञ्चालन हुने एनपिएलमा लिग चरण, ३ वटा प्लेअप र फाइनलसहित ३२ खेल हुनेछन् ।
नेपाल क्रिकेट सङ्घ (क्यान)ले यस पटक दैनिक नौ हजार चार सय ५० टिकट बिक्री गर्ने जनाएको छ । उद्घाटनसँगै शनिबारका लागि टिकट मूल्य साधारणतर्फ पाँच सय र प्रिमियमतर्फ रु एक हजार ५०० राखिएको छ । यसैगरी लिग चरण र अन्य दिनको खेलका लागि टिकटको मूल्य पाँच सय र एक हजार तोकिएको छ । प्लेअफपछिका खेलका लागि साधारणतर्फ एक हजार र प्रिमियरतर्फ रु दुई हजार राखिएको छ । क्यानले सिजनल टिकटको एकमुस्ट मूल्य १५ हजार तय गरेको छ ।
