काठमाडौं। नेकपा (एमाले) केन्द्रीय संगठन विभागले जेठ २० र २१ गते राष्ट्रिय कार्यशाला आयोजना गरेको छ। ‘सदस्यता नवीकरण तथा विस्तार उत्प्रेरणा’ विषयक दुई दिने राष्ट्रिय कार्यशालाको उद्घाटन पार्टी अध्यक्ष केपी शर्मा ओलीले गर्ने एमाले प्रचार विभाग प्रमुख नीरज आचार्यले जानकारी दिए काठमाडौंको बबरमहलस्थित कार्की बैंक्वेटमा हुने कार्यशालाको जेठ २० बुधवार बिहान ११ बजे उद्घाटन गर्ने कार्यक्रम तय भएको छ।
फागुन २१ को निर्वाचनपछि अध्यक्ष ओली पहिलो पटक उक्त दिन सार्वजनिक कार्यक्रममा सहभागी हुँदैछन्। पार्टीको सांगठानिक सुदृढीकरण र गतिशीलताका लागि आयोजना गरिएको कार्यशालामा सबै प्रदेश तथा जिल्ला इन्चार्जहरू (भारत प्रवास समेत) को सहभागिता रहने एमालेले जनाएको छ । त्यस्तै पार्टीका प्रदेश कमिटी वा सो सरहका कमिटीका पदाधिकारी र कार्यालय सचिवहरू, जिल्ला कमिटीका अध्यक्ष र संगठन विभाग प्रमुखहरूका साथै जनसंगठन केन्द्रीय कमिटीका अध्यक्ष र संगठन विभाग प्रमुखहरूको अनिवार्य उपस्थिति रहनेछ ।
दुई दिने कार्यशालामा पार्टीको सदस्यता विस्तार, नवीकरण प्रक्रिया र सांगठनिक सुदृढीकरणका भावी योजनाबारे सघन छलफल तथा उत्प्रेरणामूलक अभिमुखीकरण गरिने बताइएको छ ।
