धनुषा। धनुषाको मिथिला नगरपालिका ३ हरिपुरमा हत्या गरी गाडिएको अवस्थामा एक महिलाको शव फेला परेको छ । हरिपुरका दशैया मुखिया बिनकी श्रीमती ४८ वर्षीया रेशमी देवी बिनको शव गाडिएको अवस्थामा भेटिएको हो ।
उनको शव बुधबार साँझ ७ बजेतिर आफ्नै घरको शौचालय पछाडि गाडेको अवस्थामा फेला परेको प्रहरीले जनाएको छ । मंगलबारदेखि हराइरहेकी रेश्मीको खोजतलास गर्दै जाँदा बुधबार राती शौचालय पछाडि गाडिएको अवस्थामा शव भेटिएको इलाका प्रहरी कार्यालय सखुवा महेन्द्रनगरका प्रहरी निरीक्षक सोनु साहले जानकारी दिए ।
रेश्मीको हत्या आरोपमा उनकै श्रीमान दशैयालाई प्रहरीले पक्राउ गरेर अनुसन्धान थालेको छ । गाडिएको अवस्थामा भेटिएको रेश्मीको शव पोस्टमार्टमका लागि प्रादेशिक अस्पताल जनकपुरमा राखिएको इलाका प्रहरी कार्यालय महेन्द्रनगरले जनाएको छ ।
