काठमाडौं । साताको कारोबार हुने अन्तिम दिन सेयर बजारमा एकल अंकको करेक्सन देखिएको छ । अघिल्ला दुई दिन दोहोरो अंकले बढेको बजार आज ८ अंक भन्दा बढीले घटेको हो ।आजको कारोबार बन्द हुँदा नेप्से परिसूचक ८ दशमलव ३० अंकले घटेर २७४८ दशमलव ०५ विन्दुमा पुगेको छ । आज सेयर बजारमा कारोबार भएका ५० कम्पनीको सेयर मूल्य बढेको छ भने १९४ कम्पनीको सेयर मूल्य भने घटेको छ ।
त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि आज ३ दशमलव ३८ अंकले घटेर ४७७ दशमलव ५० विन्दुमा पुगेको छ । आज १३ परिसूचकमध्ये ३ उपसूचकको सेयर मूल्य मात्रै बढेको छ भने बाँकी १० उपसूचकको सेयर मूल्य घटेको छ ।
परिसूचकसँगै आज कारोबार रकममा पनि सामान्य गिरावट आएको छ । अघिल्लो दिन ९ अर्ब भन्दा माथिको कारोबार भएको बजारमा आज साढे ८ अर्ब भन्दा माथिको कारोबार भएको छ । आज सेयर बजारमा ३०७ कम्पनीका १ करोड ६६ लाख ६३ हजार ३५५ कित्ता सेयर ८३ हजार १२८ पटक खरिद बिक्री हुँदा ८ अर्ब ५४ कारोड ५५ लाख २५ हजार ३७३ रुपैयाँ बराबरको कारोबार भएको छ ।
आज सेयर बजारमा कारोबार भएका कम्पनीमध्ये ३ कम्पनीको सेयर मूल्यमा सकारात्मक सर्किट लागेको छ । त्यस्तै एक कम्पनीको सेयर मूल्यमा भने नकारात्मक सर्किट लागेको छ ।
