एजेन्सी । जापानमा केही दिनपछि भारी हिमपात, हुस्सु लाग्ने र समग्र रुपमा मौसमी परिवर्तन हुने भन्दै यसको सामना गर्न सबैलाई सचेत तुल्याइएको छ ।
जापानको मौसम विज्ञान सम्बन्धी निकाय (जेएमए) ले निगाता, इशिकावा र नागानो प्रान्तका साथै हिरोशिमा र शिमाने प्रान्त लगायत केही पश्चिमी क्षेत्रमा थप हिमपात र हिमपहिरोको सम्भावना रहेको जनाउँदै सबैलाई सचेत तुल्याइएको हो ।
मौसममा आउने परिवर्तनका कारण सडकहरूमा हिउँ जम्ने र सम्भावित हिमपहिरो आउनसक्ने अवस्थाप्रति सतर्क रहन यात्रामा निस्कने नागरिकहरूलाई सतर्क रहन पनि आग्रह गरिएको छ ।
बिशेष गरी स्की रिसोर्टहरू रहेको जापानी समुद्री क्षेत्रका वरपर राज्यका सर्वसाधारणलाई थप सतकर्ता अपनाउन आग्रह गरिएको छ ।
गत महिना जापानका अधिकांश शहरमा यो महिना उच्च हिमपात हुँदा ठाउँठाउँमा यातायात अवरुद्ध हुनुका साथै दर्जनौँ मानिसहरूको मृत्यु भएको थियो ।
