काठमाडौं। नेपाल आदिवासी जनजाति महासंघ (नेफिन) ले ३१औँ विश्व आदिवासी दिवस सप्ताहव्यापी मनाउने भएको छ। नेफिनले ‘प्राकृतिक श्रोत, जल, जमिन र जंगलमाथि आदिवासी जनजातिको अधिकार सुनिश्चित गर, संयुक्त राष्ट संघका एजेन्सी संस्था युएनड्रिप र आईएलओ १६९ सम्बन्धी सर्वोच्च अदालतको निर्देशनात्मक आदेश कार्यान्वयन गर’ भन्ने मूल नारासहित दिवस मनाउन लागेको हो ।
श्रावण २४ गतेदेखि श्रावण २८ गतेसम्म सप्ताहव्यापी कार्यक्रम आयोजना हुने अध्यक्ष गेल्जे लामा शेर्पाले बताए। विश्वका आदिवासीहरूले विगत ३१ वर्ष देखि मनाउँदै आइरहेको अन्तर्राष्ट्रिय विश्व आदिवासी दिवस नेपालका आदिवासी जनजातिहरूले पनि विशेष उत्सवका रूपमा मनाउँदै आएका छन् ।नेफिनले उत्सवको रूपमा मुख्य कार्यक्रम श्रावण २४ गते राष्ट्रिय सभा गृहमा मूल समारोहलाई नेपाल सरकारका प्रवक्ता तथा सञ्चार तथा सूचना प्रविधिमन्त्री पृथ्वीसुब्बा गुरुङले उद्घाटन गर्नेछन् ।
३१औँ विश्व आदिवासी दिवस नेपालमा आदिवासी जनजातिहरूको उत्सवको रूपमा आयोजना हुने भएकोले नेपालका आदिवासी जनजातिहरूका पहिचान झल्किने सांस्कृतिक झाँकीहरू, नृत्यहरू, खानाका परिकारहरूको प्रदर्शन समेत हुने नेफिनका महासचिव दिवस राईले बताए।
उत्सवमा आदिवासी जनजातिहरूका मातृभाषा र लोक भाकामा बनेका गीतहरू, सांस्कृतिक झाँकीहरू, स्थानीय र रैथाने प्रकृतिका आदिवासी जनजातीय कलाकृति सहितका प्रदर्शनी, विभिन्न जातीय भेसभुसासहित राजधानीको मध्यभाग भृकुटीमण्डप देखि र्याली हुनेछ ।
