काठमाडौं। पूर्वराष्ट्रपति विद्यादेवी भण्डारीले आफ्नो राजनीतिक सक्रियता र कार्यकर्ता भेटघाटका लागि नेकपा एमालेको संस्थागत अनुमति आवश्यक नपर्ने बताउनुभएको छ । मंगलबार बिहान विराटनगर विमानस्थलमा सञ्चारकर्मीहरूसँग कुराकानी गर्दै एमाले नेतृसमेत रहनुभएकी पूर्वराष्ट्रपति भण्डारीले कार्यक्रमहरूमा सहभागी हुन कसैसँग अनुमति लिनुपर्ने आवश्यकता नरहेको बताउनुभएको हो।
राष्ट्रपति पदबाट अवकाशपछि बढ्दो राजनीतिक भेटघाटबारे उठेका प्रश्नहरूको जवाफ दिँदै उहाँले एमाले आफ्नो रगत र पसिनाले बनेको पार्टी भएकाले त्यहाँका नेता कार्यकर्तासँग संवाद गर्न कसैको स्वीकृति चाहिँदैन भन्ने स्पष्ट पार्नुभयो । ‘राष्ट्रपति हुनुभन्दा पहिले, संगठित सदस्यता लिनुभन्दा पहिलेदेखि नै मैले पार्टीमा काम गरेकी हुँ,’ उनले भनिन्, ‘पार्टीका कार्यक्रममा मलाई बोलाउनु स्वाभाविक हो र त्यसमा सहभागी हुन मैले अनुमति लिइरहनु पर्दैन ।’
आफ्नो सक्रियतालाई स्वाभाविक कर्तव्यको संज्ञा दिँदै उहाँले समाज र जनताका आकांक्षा बुझ्न आफू देशभर घुमफिर गरिरहने बताउनुभयो।
