काठमाडौं । नेपाल पत्रकार महासंघले सञ्चारगृहका गेटमा पत्रकारहरूलाई अवरोध गर्ने गरी गरिएको गाडी पार्किङमा राज्यकै भूमिका शंकास्पद भएको निष्कर्ष निकालेको छ । महासंघकी अध्यक्ष निर्मला शर्मा, वरिष्ठ उपाध्यक्ष दीपक आचार्य र सचिव रमेश खतिवडाको टोलीले स्थलगत अध्ययनपछि यस्तो निष्कर्ष सार्वजनिक गरेको हो ।
“आज (सोमबार) बिहानैदेखि काठमाडौंका केही सञ्चारगृहको गेटअगाडि पत्रकार र पत्रकारका सवारीसाधन अवरोध गर्ने उद्देश्यले शंकास्पद रूपमा गाडी राखिएको घटनाको नेपाल पत्रकार महासंघले स्थलगत अध्ययन गरेको छ,” महासंघले भनेको छ, “अध्यक्ष निर्मला शर्मा, वरिष्ठ उपाध्यक्ष दीपक आचार्य र सचिव रमेश खतिवडाको टोलीले गरेको अधययनबाट आज बिहान ७ बजेदेखि नै तीनकुनेस्थित कान्तिपुर पब्लिकेसन, नयाँबानेश्वरस्थित अनलाइन खबर र मध्यबानेश्वरस्थित हिमालय टेलिभिजनको गेटमा शंकास्पद रूपमा छोडिएको गाडी दिउँसो २ बजेसम्म पनि राज्यले हटाउन पहल नगरेको तथा प्रहरी मुकदर्शक भएर बसेको अवस्थाले राज्यकै संलग्नतामा यो आतंक सिर्जना गरिएको आशंका उत्पन्न भएको छ ।”
महासंघले ‘राज्यले मिडियामाथि नियन्त्रण कायम गर्ने र मुख थुन्ने प्रयास गरेको’ भन्दै भर्त्सना गरेको छ । “प्रेस तथा अभिव्यक्ति स्वतन्त्रतामाथि गरिएको यो भौतिक हमलाको छानबिन गरी दोषीमाथि कारबाही गर्न माग गर्दछ,” महासंघले भनेको छ ।
महासंघले तत्काल गाडीको अवरोध हटाई सञ्चारकर्मी र सञ्चारगृहको सुरक्षा सुनिश्चित गर्न सम्बद्ध निकायको ध्यानाकर्षण गरेको छ ।
