काठमाडौं । नेपाली कांग्रेसले फागुन २१ को प्रतिनिधिसभा सदस्य निर्वाचनमा व्यहोरेको हारको कारणसहित प्रतिवेदन पठाउन परिपत्र गरेको छ । महामन्त्रीद्वय गुरुराज घिमिरे र प्रदीप पौडेलको संयुक्त हस्ताक्षर भएको परिपत्रमा चुनावमा हारका कारणससहितको समीक्षा मागिएको छ ।
१६५ निर्वाचन क्षेत्रमै गरिएको परिपत्रले पार्टी हारको वास्तविकतामा पुगेर समीक्षा गर्न सहज हुने महामन्त्री गुरुराज घिमिरेले जानकारी दिए । “हामीले हरेक निर्वाचन क्षेत्रमा निर्वाचनको समीक्षा रिपोर्ट पठाउन परिपत्र गरेका छौँ,” महामन्त्री घिमिरेले भने, “जितेका निर्वाचन क्षेत्रमा के कस्तो अवस्था रह्यो भन्ने पनि ती रिपोर्टबाट वास्तविकता आउने छ । हारका लागि के कस्ता कारणहरु रहे भन्ने रिपोर्टले भोलिका दिनमा कस्तो योजनाका साथ अघि बढ्ने निर्णयका लागि केन्द्रलाई बाटो दिन्छ ।”
क्षेत्रीय सभापतिहरूले पठाउने रिपोर्टमा हार भएका क्षेत्रमा चुनाव हराउन पार्टीभित्रबाट क–कसको भूमिका शंकास्पद वा असहयोगी रह्यो भन्ने पनि आउने केन्द्रीय कार्यालय स्रोतले जानकारी दिएको छ । ती रिपोर्टले आगामी दिनमा अनुशासन समितिलाई निर्णय लिन बाटो खोलिदिने विश्वास केन्द्रीय कार्यालका कर्मचारीको भनाइ छ । त्यसबाहेक, हरेक निर्वाचन क्षेत्रमा अनुशासन समिति रहे/नरहेको विवरण उपलब्ध गराउन पनि परिपत्र भएको छ ।
“केन्द्रीय अनुशासन समितिका तर्फबाट हरेक निर्वाचन क्षेत्रमा अनुशासन समिति रहेन नरहेको जानकारी माग्दै पनि परिपत्र भएको छ,” ती कर्मचारीले भने, “यदि कतै अनुशासन समिति बनेको छैन भने पनि बनाएर विवरण उपलब्ध हुनेछ ।”
